Di lua garih nan babalabeh di palanta ko, posting Buya ttg Nancy Tanner nan barulang aliak ka Guguak Tinggi saisuak, yo tasintak ambo. Indak manyangko ambo rumah rang gaek Buya di sinan.
Tabiang juo taban
Mungkin lai takana juo dek Buya, tiok ka sinan Nancy dikawani dek anak bujang, kuruih tinggi co tunggak listrik, asisten baliau. Kini tunggak listrik ko lah gaek ngunguah lo, nan sakali duo lai tasirobok juo jo Buya, nan di lapau ko banamo "mak Sati".
Di awa sajarahnyo, tahun 1962, Pak Yakub Isman alm, mancarian anak sasiran baliau untuak manolongi Nancy nan tingga di paviliun rumah baliau di Ateh Ngarai. Sasudah ambo baliau imbau, dan dipatamuan jo Nancy, sasuai saok jo kapuran, ambo digaji per jam, sailia samudiak lah kami baduo-duo sakitar 2 tahun lamonyo (sampai2 taseba kaba di BT, ambo lah kawin jo Nancy ko).
Baa mangko kami mamiliah Guguak Tinggi jadi objek panilitian Nancy? Disampiang alasan akademik, ado sohib ambo samo sasurau di STC Birugo, Firdaus, kamanakan rang toko ameh di Jl. Minangkabau (lupo ambo namo baliau, ha), tampek kami mamulai langkah ka masuak ka kampuangnyo ko, dan labiah2 bana, kampuang ko dakek, bisa ditampuah bajalan kaki dari Birugo.
Rumah Uwai Sarilam (induak bako Buya) di Rambuti, Guguak Tinggi Tabek Sarojo, runtuah pulo janjangny. Di rumah ko dahulu Nancy Tanner tingga sabanta.
Mancaliak foto rumah rang gaek Buya, babaliak ingatan ambo ka sinan baliak.
September 1964 ambo dapek kasampatan mangaji ka IKIP Malang dan, alhamdulillah, konco palangkin ambo nan kini musaua di palanta ko jo tandotangan "Mak Ngah, Inyiak Sungut", lai basadio manolongi Nancy manggantian ambo. Dek ambo lah indak di BT lai, jadi indak jaleh di ambo lai, cuma curito Pak Yakub Isman ka ambo sapulang mangaji dari Malang tu, Juli 1967, Nancy lah barangkek ka Kalifornia dan konsi ambo digungguangnyo kiun, sahabih kontrak, lansuang tasakek di tapi ombak nan badabua tu sampai kini.
Alah Runtuah Musajik Tapi di Kotogadang, di hoyak gampo September 2007
Cuma sakali ambo basuo baliak jo Nancy ko kutiko baliau ka BT tahun 1970-an, sudah tu lah kabua gambar baliau di ambo. ( mak Sati (L. 71+3+7), Tabiang).
Mak Sati Yth,
Alhamdulillah.
Gadangnyo hati, sanangnyo kiro-kiro.
Ikolah kalabihannyo nan tuo-tuo, lupo-lupo ma ingekan.
Tarimo kasih banyak Mak Sati.
Buya Kutiko di Madinah
Kesilapan indak bulieh di ulang bakali-kali.
Lai taragak makan anyang jo gulai pangek ikan
saroman kutiko jo si Nancy dulu tu???
Tapi sayang uwai nan gaek-gaek alah pai,
rumah kini alah kosong,
sado dunsanak alah ka jawa jo australia.
Si Firdaus kan kamanakan Haji Abu Bakar,
toko ameh tu, kini nyo alah di Riau pulo,
anak pisang kito juo mah.
Sakitu dulu Mak Sati,
Moga Allah selalu mambari kito kakuatan
jo iman nan kukuah dan ibadah nan saleh.
Salam ka anak cucu,
Wassalam,
BuyaHMA
.
Tidak ada komentar:
Posting Komentar